Friday 29 Kartik, 2076 | November 14, 2019
Menu

प्रवास

एएनएको निर्वाचन गर्न अदालती आदेश

  • बिहीबार २० चैत्र, २०७०
  • पुण्य भण्डारी
  • DISQUS_COMMENTS
(0 votes)
वासिङ्टन डिसी - तीन वर्षदेखि एकल नेतृत्वमा रहेको एसोसिएसन अफ दि नेेप्लिज इन अमेरिकाज् (एएनए) को निर्वाचन ६० दिनभित्रमा गरिसक्न अदालतले आदेश दिएको छ।
पूर्व पदाधिकारीका तर्फबाट तत्कालीन उपाध्यक्ष रजर अधिकारीले वर्तमान अन्तरिम अध्यक्ष छेवाङ शेर्पा लामाविरुद्ध दायर रिटमाथि सुनुवाइ गर्दै प्रिन्स जर्ज अदालत, मेरिल्यान्डका न्यायधीश निकोलसको एकल इजलासले यस्तो आदेश दिएको हो। अधिकारीले अदालतको रोहबरमा भएको सम्झौता अन्तरिम अध्यक्ष शेर्पाले कार्यन्वयन नगरेको भन्दै तीन महिनाअघि 'अवहेलना मुद्दा' दायर गरेका थिए।
निर्वाचन गराउने प्रयोजनका लागि दुवै पक्षलाई मान्य हुने व्यक्ति (ट्रस्टी) को नाम सिफारिस गर्न १० दिनको म्याद दिँदै यहि मार्च २८ तारिखको फैसलामा भनिएको छ– 'तीस दिनभित्र निर्वाचनसम्बन्धी खाका पेश गर्नू र ६० दिनभित्र निर्वाचन सम्पन्न गरी नयाँ पदाधिकारीको नाम बुझाउनू।' हेयरिङका दिन प्रतिवादी शेर्पा अनुपस्थित रहेकोसमेत आदेशमा उल्लेख छ।
अधिकारीले रिटमा, सोही अदालतका न्यायधीश लियो इ ग्रिनको आदेशअनसार ट्रस्टी अनुज सुदको रोहबर र तत्तकालीन राजदूत डा. शंकर शर्माको उपस्थितिमा भएको तीनबुँदे सहमति कार्यन्वयन नगरिएकोले 'अदालतको मानहानी भएको' जिकिर गरेका थिए। तीन बुँदामा वादी–प्रतिवादी र दूतावासका प्रतिनिधिसहितको त्रिपक्षीय समिति गठन गर्नुपर्ने, अविलम्ब निर्वाचन गराउनुपर्ने र संस्थाका गतिविधि र निर्णयहरूको एकप्रति अधिकारीलाई उपलब्ध गराउनुपर्ने भन्ने थियो। यद्धपि, मानहानी सम्बन्धी विषयमा न्यायधीश निकोलसको आदेश मौन रहेको छ।
यसैबीच, अदालतको रोहवरमा निर्वाचन हुने भएपछि शेर्पाद्वारा नियुक्त व्यक्तिहरूको अगुवाइमा आगामी जुलाइमा गर्ने भनिएको सम्मेलनको औचित्य समाप्त भएको छ। अदालतमा विचाराधीन एएनए विवादसम्बन्धी मुद्दा अन्तिम किनारा नलाग्दै सम्मेलन तयारीका लागि विभिन्न समिति–उपसमिति गठन गरिएको समाचार यसअघि बाहिर आएको थियो।