Wednesday 5 Kartik, 2077 | October 20, 2020
Menu

नागरिक शनिबार

वागमती लहरले उठेर बर्सिदेऊ...

  • २७ पुष, २०७०
  • वैरागी काइँला
  • DISQUS_COMMENTS
(1 Vote)
वागमती लहरले उठेर बर्सिदेऊ...
पानी.....पानी.....पानी
वागमती लहरले उठेर बर्सिदेऊ.....
पानी.....पानी.....पानी


जलेको मन झैं
डढेलो सल्केको वन झैं 
रुख र पातहरूमा दुर्लभ अभिलेखहरू झैं
सिंगो देश आगाको भेलमा जलिरहेछ जिउँदै।

आगो मनबाट लाग्यो कि तनबाट?
मनमा लाग्यो कि वनमा?
लायौ आफ्नै घरमा आगो आफैंले, उहिले कहिलेे?
मैले लाएँ कि तिमीले लायौ?
सीमा नाघेर कि को आयो तेस्रो व्यक्ति र लगायो आगो?

खप्न सकेनौं एकले अर्काको उपस्थिति,
अस्वीकारको ठक्करले ठक्कर दिँदै ठक्करले ठक्कर
सल्क्यो मन साँघुरो ठोक्किँदै द्वेष र हिंसाको झिल्काले 
र समय र जीवनको भूगोल ढाक्यो...
चेतनभित्र, अवचेतनभित्र थाक स्मृतिमा इतिहास
ज्वालामुखीको मुखमा जलेरझैं जलाइयो
इन्द्रचोक, बसन्तपुर र नयाँसडक
संस्कृति
सम्पदा
सभ्यता
शताब्दिऔंअघिको मनुष्यता र 
मानव उपलब्धिको लेखाजोखाको ठडिएको अल्गो लिंगो.....।

हाम्रो शब्द र स्वरहरू खोसेर
बिगुलको चर्को धुनमा 
अपहरित चेतनाको टाउकामाथि बुटले कुल्चँदै
को आएर हाम्रो बुद्धिमा कवाज खेल्दै छ?

काँधमा बलेको सडक भाँच्दै इँटाका टुक्राहरूले 
आँखाहरूमा डढेलो सल्केको सल्केकै छ
विगत र वर्तमान
र अन्धकारको गर्तमा अनागत
रात जलेर देह डढेलो सल्कियो।

पानी.....पानी.....पानी
वागमती लहरले उठेर बर्सिदेऊ...
पानी.....पानी.....पानी

क्षितिजमा सखारैको रातो बलेको सूर्य
तातो उम्लेको भकभकी लप्कोले
पृथ्वीमा क्याम्पफायर र 
आकाशमा आगो लगाएर,
फूल र पातहरूको आहुतिमा पड्कँदो पटपटि,
आह... जल्दै गरेका पखेटाले उडेका पन्छीहरू
र तिनको उडान... कतिन्जेल र कहाँसम्म?

पानी.....पानी.....पानी
विष्णुमती लहरले उठेर बर्सिदेऊ.....
पानी.....पानी....पानी


फूल, पात र पुतलीका जलेका लासको खरानी
र मासुको गन्धबाट उम्कन
भागेर देशबाट....
कता हिँडेको यहाँ
कहाँ पुगेर यहाँ–कहाँ आएँ?

सायद, मेरो देश अब अन्त कतै छ!
सायद, मेरो देश अब कुनै देशभित्र कतै छ!
सायद, मेरो देश अब अन्त कतै छैन!

फाँट, मैदान र पहाडको कठिनसँग जुधेर, हारेर, कुदेर
डुब्दै पौडिँदै डुब्दै
कोशी र महाकालीको उर्लँदो रगतको भलबाढी
डुब्दै पौडिँदै डुब्दै
अज्ञात लहरले फ्याँकेको बगरमा हतप्रभ,
डढेलो सल्केको तनमन
कुदेर
सल्केको आगोको जलनबाट मुक्त हुन
सकिनँ
सकेनौं
सकेनन्।

पानी....पानी....पानी
सप्तगण्डकी लहरले उठेर बर्सिदेऊ....
पानी.... पानी....पानी....

लाग्थ्यो मेरो हत्याले तिम्रो आयु थपिनेछ
तर तिमी मसँग नै किन मर्दैछौ?
लाग्थ्यो, बन्दुक बोकेरै म सुरक्षित हुनेछु
तर भयभीत अझ तिमीसँगै बढी किन हुन्छु?

हो, अघि यसरी डढेको थिएन मेरो देश,
शुभ्र र शान्त थियो मेरो देश।
फूल फुल्थे सुगन्धमय
बतास चल्थ्यो शित्तल शित्तल स्वास्थ्यबर्द्धक
पन्छीहरू आकाशमा उड्दथे आकाशमा सीमाहीन
आफ्नै बोली बोलेर 
र गीत गाएर आआफ्नै,
नदीमा प्रेम बहन्थ्यो,
वागमतीमा पानी,....
सद्भावको हरियालीले जीवन हरियो... बाँच्दथ्यौं हामीहरू।

पानी.....पानी.....पानी
सप्तकोशी लहरले उठेर बर्सिदेऊ.....
पानी....पानी....पानी

किन खप्न सकेनौं एकले अर्काको उपस्थिति.....
के हामी एकै घरभित्र अँटाउँदैनथ्यौं?
ऊ ऊ नै भएर 
तिमी तिमी रहेर
म म नै भएर
आआफ्नै बोली बोलेर....
जसरी भिन्न रंगका फूलहरू भिन्न बासना छरेर
फुल्दछन् फूलबारीमा फूल भएर फुलेर?
र फूलबारी सम्पूर्णले हुन्छ सौन्दर्यमय फूल भएर फुलेर?

पानी.... पानी....पानी.....

काइँलाको कविताकृति …अन्धा मान्छेहरू र हात्ती' बाट
यातायातको चोर बाटो

यातायातको चोर बाटो

काठमाडौं– उदयपुरका माधवप्रसाद दाहाल सोमबार दुई बजे मोटरसाइकलको कागजपत्र ‘चेक' गराउन ललितपुर ताल्छीखेलस्थित बागमती यातायात कार्यालय आइपुगे। बाटैमा उनलाई बिचौलियाले रोके, 'एक हजार दिनूस्, आजै काम हुन्छ।' दाहाल अन्कनाए। सोझै...

खुकुरी

किन–किन पुष्पा दिदी मलाई मन पराउनुहुन्न।उहाँ अत्यन्त भलाद्मी देखिनुहुन्छ। रूपरङ र बोली पनि मिठो छ। जब उहाँ क्याम्पस छिर्नुहुन्छ, अघिपछि दर्जन केटी देखिन थाल्छन्।– ‘पुष्पा दिदी, स्ववियुले हामीलाई कहिले पिकनिक...

संघर्षको सहरमा सफलताको वर्षा

'मैले योभन्दा बढी पढाउन नसक्ने भएँ । अरू पढ्नुछ भने काठमाडौं जा, काम गरेर पढ्,' आठ कक्षा पढ्दै गरेका शम्भु श्रेष्ठ बाबुको यस्तो आज्ञा प्रतिवाद गर्ने सामथ्र्य राख्दैनन् । मात्र...

'जाली फटाहालाई छाडिन्न'

'जाली फटाहालाई छाडिन्न'

काठमाडौं– 'जग्गा अधिग्रहणले बागमतीको नक्सा नै बदलिएको छ।'यो भनाइ हो, अधिकारसम्पन्न बागमती सभ्यता एकीकृत विकास समितिका आयोजना प्रमुख गजेन्द्रकुमार ठाकुरको।उनी बुधबार दिउँसो आफ्नो टोलीसँग मीनभवनस्थित विश्व निकेतन स्कुल क्षेत्र आइपुगेका...

महानायकको एक्लो दसैं

महानायकको एक्लो दसैं

अभिनेता राजेश हमाल दसैं आएको र गएको चालै पाउँदैनन्। उनको घरमा 'दसैं कोठा' छ। तर, त्यहाँ जमरा नउमि्रएको एक दशकजति भयो। दुर्गा कवच र चण्डीपाठ गर्न पण्डितहरू आउन छाडे। न...

'महान् सहिद'मा रातो धर्का

कवि इच्छुकको बारेमा सम्झन लायक 'ठूल्ठुला' प्रसंगहरू नहुने नै भए। २०५८ सालताका म एउटा सानो 'कमरेड कवि' त्यसमा पनि अन्तर्मुखी। जिब्रोमो 'चिप्लो पदार्थ'को कमी भएको म ठूल्ठुला कमरेडहरूसँग त्यति सजिलै...

घामको झुल्को

घामको झुल्को

प्राकृतिक सौन्दर्यले भरिपूर्ण गाउँ लाई पर्यटकीय केन्द्र बनाउन दशकदेखि सक्रिय अन्तुवासी अचेल सन्तोषको सास फेर्दै छन्। सात वर्षसम्म हरेक मंसिरमा महोत्सव गर्दै, विकास निर्माणमा जुट्दै र प्रचारमा समय खर्चिंदै आएका...

सास्ती र सुस्तीको घर

काठमाडौं– बिरामी लिएर अस्पताल पुग्ने आफैं बिरामी भएर फर्कन्छन्, उपचारको पालो कुर्दाकुर्दै कति बिरामीको मृत्यु हुन्छ। भनसुन गराउन सके शऒ्ढया पाइन्छ, नसके निजी अस्पतालको रेफर लिएर फर्कनुपर्छ।