म्युजिक भिडियोसँग आवद्ध युवाहरुले बनाएको फिल्म हो 'जिन्दगी रक्स।' दर्जनभन्दा बढी म्युजिक भिडियोको निर्देशनपछि निकेश खड्काले 'जिन्दगी रक्स'मार्फत् निर्देशनमा डेब्यु गरेका हुन्। फिल्मको मुख्य भूमिकामा देखा पर्ने सौरमराज तुलाधार, अकेशा विष्ट र सोनम पाखि्रन पनि म्युजिक भिडियोकै मोडल हुन्।

रमाइलो गर्न भनेर यात्रामा निस्केका दुई युवायुवतीले भोग्नुपर्ने समस्यालाई फिल्मले आफ्नो विषय बनाएको छ। फिल्ममा ऋचा शर्मा, प्रकृति श्रेष्ठ, कमन राई, विक्की पुलामी आदि कलाकारको अभिनय रहेको छ। हरि हुमागाईंको छायांकन रहेको फिल्मलाई सुजिता श्रेष्ठले निर्माण गरेकी हुन्।

सुनौलो सपना बोकेर विदेशी भूमिमा पुग्ने नेपालीले भोग्ने कष्टमा आधारित फिल्म हो 'माई प्रमिस।' सुरज सुब्बा नाल्बोले निर्देशन गरेको फिल्ममा अधिकांश दृश्य सिंगापुरका हेर्न पाइन्छन्। फिल्ममा केकी अधिकारी, विल्सनविक्रम राई, रमेशचन्द्र राई, नरकुमार लिम्बु, अनुराग कुँवर, मार्टिन खान आदि कलाकारको अभिनय रहेको छ। टंक लिम्बुले निर्माण गरेको फिल्म बनेको लामो समयपछि प्रदर्शनमा आउन लागेको हो।